Кыргыз Республикасынын Президентинин 2023-жылдын 29-декабрындагы №370 Жарлыгынын жана Министрлер Кабинетинин 2024-жылдын 7-февралындагы №52 токтомунун негизинде, Жалал-Абад облусунун Базар-Коргон районуна караштуу “Арстанбап”, “Кызыл-Үнкүр”, “Могол” айыл аймактары жана Талдуу-Булак айыл аймагындагы Көк-Алма айылы бириктирилип, 2024-жылдын 20-февралында Арстанбап-Ата айылдык кеңешинин №2 токтому менен “Арстанбап-Ата” айыл аймагы болуп кайра түзүлгөн жана 2024-жылдын 27-мартында мамлекеттик каттоодон өткөн.

Арстанбап-Ата айыл аймагы Жалал-Абад облусунун түндүк-чыгыш тарабында, Базар-Коргон районунда жайгашкан. Аймак батышта Кеңеш айыл аймагы, түштүктө Сузак району, түндүк-чыгышта Токтогул району жана түндүк-батышта Ноокен району менен чектешет. Айыл аймактын борбору — Ооган-Талаа айылы. Ал облустук борбордон 65 км, райондун борборунан 45 км, ал эми Бишкек шаарынан 565 км алыстыкта жайгашкан.

Аймак негизинен тоолуу жана жаңгак токойлуу. Деңиз деңгээлинен 1100 метр бийиктикте жайгашкан. Климаты кескин континенттик болуп, айыл чарбасына олуттуу таасир этет. Кышы 4–5 айга созулуп, кар калың түшөт. Температура кышында -25°C чейин төмөндөшү, жайында 35–38°C чейин жогорулашы мүмкүн.

2025-жылдын 1-январына карата Арстанбап-Ата айыл аймагында 17 айыл бар. Жалпы калк саны — 49 811 адам, кожолук саны — 10 198.